2 Samuël 20
01Bie touvaal was doar in Gilgal n dikke deugennait, hai haitte Seba en was n zeun van Bichri, ain oet stam Benjamin. Dij bluis op hoorn en raip: "Wie hebben niks te moaken mit dij haile David en niks te verwachten van dij zeun van Isaï. Vot, noar hoes, ie Isrelieten!"
02Dou gingen ale Isrelieten bie David vot en achter Seba aan. Mor lu van Juda bleven achter heur keunenk stoan en gingen mit hom van Jordaan noar Jeruzalem.
03Dou keunenk David weerom was in zien pelaais in Jeruzalem, zette hai dij tien bievraauwen dij hai doar loaten haar om op t pelaais te pazen, in n hoes apaart mit hoesarrest. Hai bleef veur heur zörgen, mor haar gain omgang meer mit heur. Tot aan heur dood tou leefden ze as onbesturven wedevraauwen.
04Dou gaf keunenk David Amasa bevel: "Roup mie ale soldoaten van Juda op en wees hier in Jeruzalem overmörgen weer present."
05Amasa ging votdoalek hèn en raip heur bie nkander. Mor hai was ter nait kloar mit op tied dij David besteld haar.
06Doarom zee keunenk tegen Abisai: "Nou kin dij Seba ons nog wel ais meer te doun moaken as Absalom. Goa vot op pad mit aal mien volk en joag achter hom aan. Aans moakt hai zok nog boas over ain of meer vestingsteden en ontkomt hai ons."
07Abisai ging doalek op pad, Seba achternoa, mit Joäb en zien manschoppen, mit David zien liefwacht en aal zien keurtroepen.
08Dou ze bie dikke stain in Gibeon wazzen, kwam Amasa der ook net aan. Joäb haar onder zien tuniek n sweerd aan koppelraim, makkelk veur t griepen.
09Hai pakte Amasa mit rechterhaand bie board om hom n smok te geven en zee: "Hou is t mit die, kammeroad?"
10 Amasa was nait verdocht op t sweerd dij Joäb in linkerhaand haar. Joäb stook hom zo stief onder in t lief dat zien daarms der oetkwammen en op grond vuilen. Amasa was op slag dood. Joäb en zien bruier Abisai gingen vot weer achter Seba aan.
11 Ain van Joäb zien adjudanten bleef bie Amasa stoan en raip: "Wèl veur Joäb is en veur David: volg Joäb!"
12 Amasa lag doar midden op stroat, in n poul bloud. Dou soldoat van Joäb zag dat elk der bie stoan bleef, sleepte hai t liek van weg òf in baarm, en omreden elk dij der bie langs kwam toch nog weer stoan bleef om te kieken, gooide hai der n klaid overhèn.
13 Dou hai hom zo op zied van weg oet zicht hoald haar, marsjeerden ze altmoal weer wieder achter Joäb aan, op jacht noar Seba.
14 Seba was in tied al dwaars deur hail Israël trokken noar Abel-Bet-Maächa. Ale leden van femilie Bichri haren zok doar bie hom aansloten.
15 Joäb zien manschoppen kwammen doar ook aan en sloten Seba op in stad. Ze baauwden n belegernswaal tegen boetenmuur aan, en aal t volk van Joäb was drok in de weer om stadsmuur te ondermienen en zo instörten te loaten.
16 Nou was ter in stad n toeke vraauw, dij raip: "Heur es, heur ais even! Zeg tegen Joäb dat hai dichterbie komt. Ik wil geern wat mit hom beproaten."
17 Joäb kwam dichterbie en zai vruig: "Bin ie Joäb?" "Joa," zee dij, "dat bin ik. Luster asjeblieft noar wat ik joe te zeggen heb, as k zo vrij wezen mag." "Zeg t mor," zee Joäb.
18 "In olde tieden," zee ze, "wer der altied al zegd: 'Dij road hebben wil, mout noar Abel goan.' En den kwam t veur mekoar.
19 Ons stad is de vreedzoamste en betraauwboarste in Israël. Mor nou wil ie n stad dij as n mouder in Israël is, oetmoorden. Woarom wil ie t aarfdail dat God ons geven het verrinnewaaiern?"
20 "Gain hoar op mien kop dij doar aan denkt," zee Joäb.
21 "Gain sproake van! Mor n kerel woaraarns oet t baarglaand van Efraïm, aine Seba, zeun van Bichri, is in opstand kommen tegen David, ons keunenk. t Is ons allenneg om dij kerel te doun. Lever hom aan ons oet, den bin ie van ons òf." Vraauw zee tegen Joäb: "Ie kinnen der op aan: ie kriegen zien kop van muur òf tougooid."
22 Mit dizze loze zet ging zai noar t stadsbestuur, van dij gevolgen dat ze Seba, Bichri zien zeun, kop ofhaauwden en Joäb tougooiden. Dij bluis dou op hoorn en gaf odder dat ze stad mit vree luiten. Dou gingen ze vot, elk noar zien hoes, en Joäb ging weerom noar keunenk David in Jeruzalem.
23 Joäb was weer generoal over t haile leger van Israël. Benaja, zeun van Jojada, haar Keretieten en Peletieten onder zien kommando.
24 Adoram ging over aarbaidsdainst. Josafat, zeun van Achilud, was roadsheer.
25 Seja was hofschriever. Sadok en Abjatar wazzen priesters.
26 Ook Ira oet Jaïr was priester aan t hòf van David.
|